Երևան քաղաքի առաջին ատյանի ընդհանուր իրավասության դատարանի Ավան նստավայրում այսօր տեղի ունեցավ Վազգեն Մանուկյանի գործով հերթական դատական նիստը։ Գործը մտավ դատական վիճաբանությունների փուլ։
Մեղադրական ճառով հանդես եկավ դատախազ Արմեն Գևորգյանը՝ ներկայացնելով մեղադրանքի հիմքում ընկած «փաստերն ու վերլուծությունները»։
Մեկ ժամից ավել տևած մեղադրական ճառից հետո, որտեղ դատախազը փորձեց հիմնավորել Մանուկյանի նկատմամբ առաջադրված մեղադրանքը, այն է՝ իշխանությունը զավթելուն, տարածքային ամբողջականությունը խախտելուն կամ սահմանադրական կարգը բռնի տապալելուն ուղղված հրապարակային կոչերը, ի վերջո դատախազը պահանջեց Վազգեն Մանուկյանի նկատմամբ կիրառել պատիժ՝ տուգանք 500 հազար դրամի չափով։
Նշենք, որ ՀՀ քրեական օրենսգրքի 301 հոդվածը, որով մեղադրանք է առաջադրվել Մանուկյանին, նախատեսում է նաև մինչև 3 տարվա ազատազրկում, սակայն դատախազը պահանջեց ամենամեղմ պատիժը՝ հաշվի առնելով, որ Վազգեն Մանուկյանը եղել է ՀՀ 3-րդ Հանրապետության առաջին վարչապետը, Արցախյան պատերազմի առաջին տարիներին զբաղեցրել է պետնախարարի, այնուհետև պաշտպանության նախարարի պաշտոնները, հետագայում շուրջ տասը տարի հանդիսացել է ՀՀ ԱԺ պատգամավոր, գիտությունների թեկնածու է, ունի մի շարք պարգևներ և այլն։
Պաշտպանական կողմը՝ ի դեմս փաստաբաններ Էրիկ Ալեքսանյանի և Արամ Վարդևանյանի, հանդես եկավ պաշտպանական ճառով՝ մեղադրանքը որակելով անհիմն և ներկայացնելով հակադիր փաստարկներ։
Պաշտպանների կողմից շեշտվեց հատկապես այն հանգամանքը, որ, Վազգեն Մանուկյանը քաղաքական դերակատար է, և նրա հայտարարությունները քաղաքական բնույթ են կրում, հետևաբար նշված հայտարարությունները նույնպես պետք է դիտարկել բացառապես քաղաքական համատեքստում և խոսքի ազատության տիրույթում, ինչը չի կարող պարունակել հանցանքի հատկանիշներ։
«Իշխանության քննադատությունը և հրաժարականի պահանջը քաղաքական դիրքորոշում է, և Մանուկյանն իր քաղաքական տեսակետն արտահայտելու թույլատրելիության դաշտում է գտնվել։ Դրանք բռնության ուղերձներ չեն, այլ քաղաքական քննադատություն»,-նշեց փաստաբան Էրիկ Ալեքսանյանը՝ հավելելով, որ հանրային գործիչների, այդ թվում՝ պատգամավորների, բարձրաստիճան ոստիկանների նկատմամբ քննադատության շատ մեծ սահմաններ են նախատեսված նաև Մարդու իրավունքների եվրոպական դատարանի կողմից կայացված նախադեպային իրավունքում։
Փաստաբան Ալեքսանյանը նկատեց, որ 2018 թվականի ապրիլ-մայիս ամիսներին տեղի ունեցած հայտնի իրադարձությունների ժամանակ շատ ավելի կտրուկ համանման հանրային գործընթացներ են կատարվել, բայց որևէ քրեական հետապնդում որևէ անձի նկատմամբ չի իրականացվել։
Ամփոփիչ խոսքում Էրիկ Ալեքսանյանը ներկայացրեց Վազգեն Մանուկյանի անցած ճանապարհը՝ հատկապես շեշտելով այն հանգամանքը, որ Արցախյան առաջին պատերազմում Վազգեն Մանուկյանի՝ որպես պաշտպանության նախարար պաշտոնավարման ժամանակ է պատերազմի ընթացքը դրական առումով փոխվել։
«Չեմ կարծում, թե մենք բոլորս երազել ենք այսօրվա Հայաստանի մասին, երբ արժեզրկվել են պետական, ռազմական կոչումները, և ամբաստանյալի կարգավիճակ է շնորհվում մարդկանց, որոնք իրենց ողջ կյանքը նվիրել են նրան, որպեսզի Հայաստանի Հանրապետությունը մշտապես գտնվի բարձր դիրքում, իսկ յուրաքանչյուր հայ երազի հաջորդ կյանքում նույնպես ազգությամբ հայ ծնվել»,-ասաց փաստաբանը։
Ելնելով վերոգրյալից՝ պաշտպանական կողմը դատարանին խնդրեց առաջադրված մեղադրանքը չընդունել և Վազգեն Մանուկյանին արդարացնել։
Հաջորդ դատական նիստը նշանակվեց ս․թ․ մայիսի 29-ին՝ ժամը 16։30-ին, որից հետո դատարանը կհեռանա խորհրդակցական սենյակ վերջնական դատական ակտ կայացնելու։
